張專輯屬於本縣

對我來講，每個城市都有渠對應个歌。歌个詞曲搭城市个契合度嘸較關係，有關係个是垃箇宕地爾曾經反覆垃聽。譬如講《處女空氣》直接對應海南崖州，再譬如《再一次實現》直對武昌。
張專輯屬於本縣。垃網上向預購爻，到十六號再到个一張，之前一直聽个是試聽版。
上班頭頸勁沃長久爻，箇兩個月頭都覺得脹來孬過。所以聽老姐建議，夜裡都走瓦嶼山頭練習倒退。一面倒走，一面扭頭𢩰頸，聽个便是倚張專輯。便替垃山頭旋圈，仰頭便望得著光汙染个天空，側耳咦聽得著未僵个蟲聲。
應該講嘸特別偏向哪一首，挨坒細聽落來行雲流水一般順當。後慢垃電腦客戶端裡向記望，《控制狂》已經播放次數超過兩百爻。望來還是節奏明快个比較合味。